మాజీ ప్రధానమంత్రి, భారతరత్న స్వర్గీయ రాజీవ్ గాంధీ వర్ధంతి సందర్భంగా తెలంగాణ ముఖ్యమంత్రి శ్రీ ఎ. రేవంత్ రెడ్డి డాక్టర్ బీఆర్ అంబేద్కర్ సచివాలయం ముందు ఆ మహానేత విగ్రహానికి పుష్పాంజలి ఘటించారు. రాజీవ్ గాంధీ స్ఫూర్తితో తెలంగాణలో అభివృద్ధి, సంక్షేమ కార్యక్రమాలను ముందుకు తీసుకెళ్తున్నామని ముఖ్యమంత్రి స్పష్టం చేశారు.
21వ శతాబ్దానికి దిశానిర్దేశం చేసిన మహానాయకుడు
21వ శతాబ్దంలో దేశాన్ని కంప్యూటర్ యుగం వైపు నడిపించి దశ, దిశ చూపించిన గొప్ప నాయకుడు రాజీవ్ గాంధీ అని సీఎం రేవంత్ రెడ్డి గుర్తుచేశారు. టెలికాం, కంప్యూటర్ రంగాల్లో ఆధునిక సాంకేతిక విప్లవం తీసుకొచ్చి దేశ యువతను సన్నద్ధం చేసిన దూరదృష్టి గల నాయకుడని కొనియాడారు.
దేశ సమగ్రత కోసం ప్రాణాలర్పించిన త్యాగమూర్తి
మహాత్మగాంధీ, ఇందిరాగాంధీ వంటి మహానాయకుల స్ఫూర్తితో పనిచేస్తూ దేశ సమగ్రత కోసం రాజీవ్ గాంధీ ప్రాణాలర్పించారని ముఖ్యమంత్రి అన్నారు. దేశ పురోభివృద్ధికి మహిళా భాగస్వామ్యం అత్యవసరమని భావించి స్థానిక సంస్థల్లో మహిళా రిజర్వేషన్లు కల్పించిన దార్శనిక నేత రాజీవ్ గాంధీ అని ప్రశంసించారు.
మహిళా రిజర్వేషన్పై ప్రధానికి విజ్ఞప్తి
“లోక్సభ, శాసనసభల్లో మహిళా రిజర్వేషన్లకు సంబంధించి ఎలాంటి చిక్కుముడులు లేకుండా పార్లమెంట్ ప్రత్యేక సమావేశాలు నిర్వహించి మరోసారి బిల్లును ప్రవేశపెట్టాలి.”
— శ్రీ ఎ. రేవంత్ రెడ్డి, తెలంగాణ ముఖ్యమంత్రి
తెలంగాణతో గాంధీ కుటుంబ అనుబంధం
తెలంగాణతో ఇందిరాగాంధీ కుటుంబానికి గొప్ప అనుబంధం ఉందని సీఎం పేర్కొన్నారు. ప్రత్యేక తెలంగాణ రాష్ట్ర ఏర్పాటులో సోనియా గాంధీ సాహసోపేతమైన నిర్ణయం తీసుకున్నారని గుర్తుచేశారు.
కార్యక్రమంలో పాల్గొన్న ప్రముఖులు
ఈ వర్ధంతి కార్యక్రమంలో మంత్రి పొన్నం ప్రభాకర్తో పాటు ఎంపీలు, ఎమ్మెల్సీలు, ఎమ్మెల్యేలు మరియు ఇతర ప్రజాప్రతినిధులు పెద్ద సంఖ్యలో పాల్గొన్నారు.
